星期二,請假一日,跟魯婆仔、世伯、阿嫂一行四人返魯婆仔鄉下摘荔枝! 到步之後,世伯決定先填飽個肚再開工,於是去咗一間叫"鑫福"嘅酒樓開餐。
哩間嘢D燒鵝唔會太肥,皮又夠脆,用嚟送瀨粉同米粉就至正!我地仲叫咗紙包骨、叉燒包同油麥菜,樣樣都幾好食,不過炒菜D油就重手咗D...
食完嘢,行一陣就到世伯東莞間屋,屋前棵荔枝樹有兩層樓高,荔枝生到一樹都係!
因為天雨關係,未能即時開工擲荔枝,但係過咗冇幾耐,世伯隔離屋嘅老友就攞咗支好長嘅竹出嚟幫我地擲荔枝。
哩支長竹嘅頂端係開咗叉嘅,所以只要往樹上一叉,叉住咗D幼枝,再用力一扭,聽到"啪"一聲,幼枝應聲折斷,就夾到荔枝落嚟架喇! 真係一件好專業嘅原始用具呀!
世伯接棒繼續夾D荔枝落嚟,有時支長竹夾唔實抽荔枝,就會成抽荔枝跌落地,跌到爆晒口,我地就係咁執D爆咗口嘅嚟食;又有時會好似上面幅相咁,夾到一大堆枝葉落嚟,但係就得一兩粒荔枝...
荔枝跌到一地都係...
之後,我同老婆仔就負責剪荔枝椗。
剪剪埋埋一大堆枝葉。
肥美荔枝採之不盡~~
我都落場試下用竹擲荔枝先,支長竹又長又重,又要岳高頭標準樹枝嚟夾,夾實之後仲要用力扭斷樹枝...結果,有一次放支長竹落嚟嘅時候控制得唔好,唔小心"扳"親阿嫂個頭,好彩唔係太大力,阿嫂個頭冇咩事...嚇死我~~~
大家輪流夾夾夾,但係夾極都仲有好多荔枝响樹上,於是決定用廿蚊請個採擲高手幫我地擲埋餘下嘅荔枝。 
採擲高手身手靈活,响樹上面左爬右爬,三兩下手勢就已經擲光棵樹D荔枝咁濟。 魯婆仔仲發現隔離棵芒果樹跌咗粒芒果落嚟,一試之下,酸嘅~~~
最後,我地四個人攞咗一大車,兩大袋返香港。不過,其實只係攞咗冰山一角咋...仲剩低好多好多好多好多荔枝,留低俾鄉里們慢慢享用。
一粒荔枝三把火,今次擲到咁多荔枝,簡直係火鳳凰呀~~~
